屈福特轉行蠱惑保頓讓波照捧

猪拉多纳

早排爆出英格蘭低組別賽事，假波問題猖獗，皆因球員人工低，更加唔可以同英超相提並論。除薪酬待遇之外，球會老闆背景亦要留意。烏甸尼斯老闆保素同時係英冠球隊屈福特班主，搞到隊波今季亦好有意式蠱惑味道，不時獲睇好下倒灶，難免令人懷疑保素將意甲假波歪風帶到屈福特。

保素1986年收購當時陷入假波案嘅烏甸尼斯後，唔單止冇帶領球隊行番正途，仲捲入操控賽果事件，包括1990年被踢爆打電話畀拉素會長，想內定比數。屈福特今季表現亦蠱蠱惑惑，最離譜係主場吞現時包尾嘅伊奧維3蛋，但前早作客又可以打和榜首李斯特城。

屈福特今晚挾近5仗3勝2和嘅佳績，作客對已經9場聯賽不勝嘅保頓，竟然有得受讓，表面睇讓球客勝似筍爆，但邊有咁大隻蛤乸隨街跳，小心提防屈福特又「忽然失準」。

（周六晚11時開賽）