狀態曳鋒力弱皇蘇頂唔住巴塞

猪拉多纳

今晚皇家蘇斯達會喺西甲主場迎戰聯賽「一哥」巴塞隆拿。兩軍啱啱喺西班牙盃4強戰碰頭，最終巴塞以總比數3:1淘汰皇蘇。時隔10日，皇蘇再喺主場遇上狀態更佳嘅巴塞，要成功復仇機會唔大，1.82倍「讓球客勝」係穩陣之選。

（now632台周日凌晨3:00直播）
巴塞返晒嚟 美斯喪入波

皇蘇狀態普通，上星期憑住卡路士韋拿一箭定江山，先至喺馬拉加身上取得近5場嘅首場勝仗，家陣皇蘇最大嘅問題係火力疲弱，佢哋踏入2月後踢咗5場比賽淨係入得兩球，上季嘅主力射手阿基里斯又跌晒watt，今季聯賽只係交出5個「士哥」，直接削弱鋒力。皇蘇暫時落後第4位嘅畢爾包4分，想拎到下屆歐聯入場券嘅話，佢能唔能夠復甦相信係一個關鍵，但以目前嘅狀態，今場對住巴塞想破蛋都有難度。

巴塞自主場對華倫輸波後，近5仗獲得4勝1和，其中攻入15球、只失2球，明顯已回復正常水準，絕對唔係莫連奴所講「近年最弱嘅巴塞」！「地上最強」周中喺歐聯作客曼城，憑美斯同丹尼爾各建一功，首回合領先2:0，雖然賽後被質疑有「黑哨」之嫌，但全場巴塞都佔有主導權，勝出實屬正常。啱啱復出嘅尼馬表現唔錯，而且近4場勁入6粒嘅美斯狀態甚佳，鋒力唔成問題，最重要係守將碧基同丹尼爾近幾仗都回復水準，少咗「蝦碌」，今晚對皇蘇，呢3分十拿九穩！