實業風采大閘試準

猪拉多纳

　　第三場四班草地1400米，表面睇是一場水準不高的賽事，事關14匹正選上陣馬中，只有三駒上仗能上名，仲係得第三名，不過，名次未必可反映一切。就好似葉楚航馬房隻「實業風采」，上場出閘慢沿途居於較後位置，入直路又要走外叠追趕，仍能追回一席位置，對於一匹第二次上陣的三歲馬而言，絕對收貨有餘。「實業風采」拼後唔急於再戰，期間保持正常操練，本月初更安排一課大閘，末段鞍上人潘頓輕騎即交出好反應，狀態進一步提升，試準後即報跑今場，目標清晰，葉楚航潘頓組合可望繼周三谷戰後，再携手入凱旋門。

　　最強對手應是「紅運飛駒」，上仗初出1200米得第四，沿途外叠有此表現絕不簡單，況且蔡廐馬熱身後增程大多乃出擊信號，力足一拼。

　　另外尾場二班草地1400米，絕對唔相信「醒目精伶」技止於此，上場在韋達胯下跑田草1200米，起步慢已失先機，入到直路更要勒避，可謂完全冇跑過，今次終於增程跑1400米，以本身爆發力只會更啱衝，換上莫雷拉有力贏番場。向東