雷神熱門信得過

猪拉多纳

　　跑埋呢次賽事，莫雷拉又要停賽3日。話時話，佢都算停得幾密，三日唔埋兩日就畀人罰，係咪雷神真係陣上不小心，定係矯枉過正，一線之差咋，執法若然唔係一視同仁，好容易令人產生一種錯覺，似係槍打出頭鳥。

　　有冇判錯，你有你講，佢有佢講，其實拗嚟冇結果，而當事人唔上訴，默默承受，唔代表認為自己有錯，只係尊重遊戲規則，呢份氣量，唔係人人可以做得到。

　　如果唔係之前再三停賽，雷神依家可能已經趕過潘頓，目前二人相差5場頭馬，根本唔係一個咩數目，以佢1日隨便都三兩場，兩期賽事已可反敗為勝，所以，除非潘頓忽然大勇，在未來3期賽事以狂風掃落葉式數胡，如果唔係，好快畀雷神踼落第二位。

　　好嘞，講番莫雷拉停賽前一戰，又係場場有馬騎，隔晚除咗「御綵」冷到震，隻隻都有飛，可以話由頭場熱到尾場，而3倍或以下賠率有3隻，順場次序為「金瀛」、「兵工闖」及「軍事出擊」，雷神向來係熱門保衛者，只要唔介意賠率冇乜味道，信者得救，一於捧佢。Jack