紅運飛駒熱完身搏

猪拉多纳

　　呢排最當旺梗係莫雷拉，再多講等於話阿媽係女人！另一位唔起眼，密密食，又交得準嘅，安國倫當之無愧。佢目前已有37場頭馬，落後韋達兩場啫，而且近兩期手風大順，5場落咗袋，而呢期啲馬又夠勁，保守啲估計，兩W唔會攞唔到。

　　第三場四班1400米。「紅運飛駒」初出跑1200米，全程第四，位置由出閘後一直冇改變過，睇隻馬冇咩爆發力，唔會係短途料子，跑完一場熱身，即刻轉嚟1400米，蔡神仙加程加得咁急，證明隻馬真係有咁嘅需要。

　　「紅運飛駒」呢件綵衣今季只係贏過「君河」，「紅駿」搏來搏去未得住，而呢匹馬質新，有唔錯質素，點會嘆慢板。

　　第四場四班1200米。「伽楠」今季成績唔係突出，咁耐以嚟跑過1場第二，其他場場冇位置，實力唔會叻得去邊，但又唔應該要等到落五班先至有得贏。

　　此駒上次轉谷草唔掂，死死氣返田草，有1400米唔跑，係要跑短途，無非貪對手冇咁強，希望幫隻馬執番場。

　　第七場一級賽2000米。7匹馬場合，金盃場面單調，大摩有便宜唔使洗頸，人哋唔積極參與，佢就繼續馬海戰術，5隻係來自阿摩，邊匹會係主力？

　　冷敲醉必勝

　　如果睇飛，「軍事出擊」九成九主攻手，之但係，大摩機關算盡，又奇謀妙計，有啲時候，愈係似層層嗰匹，就愈唔係嗰匹，就係咁諗，我不如冷冷哋，敲吓隻「醉必勝」。陳華棟 資深評馬人