紅軍怒火燒鵝半場收爐

猪拉多纳

足總盃出局 阿蘇史獨仲未嬲完

香港天氣終於開始回暖，但點都唔及利物浦晏菲路嗰邊咁「熱」，今晚利物浦回師主場對「天鵝」史雲斯，除咗有一班超級熱情嘅利迷為紅軍吶喊打氣，令晏菲路變成「熱情的沙漠」之外，以SAS組合為首嘅場上11名紅軍球員亦熱血沸騰，實行搶韁狂攻，將英足盃出局嘅怒火發洩喺史雲斯身上，紅軍火氣咁猛，相信「天鵝」好快變「燒鵝」，科娜決定支持半場大同利物浦半場勝！

（now 621周日9時30分直播）
4萬粉絲齊齊潑火

利迷出名勁有熱情，4萬幾名球迷齊齊喺開賽前大唱會歌《You'll Never Walk Alone》已經係指定動作，比賽中途佢哋亦冇停過口，一路舉住愛隊頸巾，或者瘋狂搖旗，一路大唱為球員打氣嘅歌曲，呢個「第12人」嘅威力真係非同小可，今季領隊羅渣士成功令晏菲路變成地獄主場，攻力超強，令呢班「第12人」更加熱力逼人，現場氣氛勁升溫，搞到當地溫度完全唔似得10度以下，真係講講吓科娜都好想去晏菲路「朝聖」，感受一吓利迷嘅熱情點樣「好像一把火，燃燒着整個沙漠！」

今場利物浦繼續有「第12人」嘅吶喊助威，一班球員，特別係蘇亞雷斯，就更有動力將「天鵝」燒熟，阿蘇喺開季前喊晒話要走，其後改變初衷，佢話其中一個原因係一班利迷喺佢低潮期仍對佢不離不棄，一直支持佢、畀佢信心，今場開賽前佢特別喺官網衷心感謝球迷，話利迷嘅支持推動佢前進，又特別講到上周喺英足盃畀阿仙奴踢出局嗰場：「輸畀阿仙奴好令人失望，因為我哋表現其實好好，但我哋唔可以畀呢場嘅失利影響，要努力踢好今場波。」睇嚟阿蘇仍然對上場輸波深深不忿，已經連續4場冇波入嘅佢仲唔將怒火發洩喺史雲斯身上，用入波嚟報答利迷嘅支持。
史雲斯作客失波多

至於同樣谷埋成肚火仲有「史獨」史杜列治，佢上場多次失機，埋下輸波伏線，賽後仲激動流淚為輸波自責，證明佢對勝利嘅渴望同熱情。今晚呢對SAS組合誓要用入球嚟出氣，對住現効力史雲斯嘅前隊友舒維爾都冇情講，更何況「天鵝」聯賽近10場作客場場有失波，以咁嘅防守力對住火力強橫嘅紅軍肯定有難，相信半場都頂唔住，半場大同利記半場勝不妨兼投。