華倫以攻代守博大霧

猪拉多纳

今周咁多場波，係咪有啲眼花呢？阿King今日就專登揀西甲嚟講，希望可以幫到各位迷失嘅朋友搵到方向喇！「蝙蝠軍團」華倫西亞會喺主場對ＣＦ格蘭納達，主隊有中堅列卡度哥斯達要停賽，防線有隱憂，阿King覺得捧大較為啱數。

（now 632周一凌晨2時直播）

「蝙蝠軍團」上年年尾搵嚟前聖羅倫素主帥比斯執教，呢位上季率領聖羅倫素贏得阿甲首循環聯賽冠軍嘅阿根廷裔西班牙主帥鍾意以攻代守，經佢一番調教，「蝙蝠軍團」已開始成為「進擊的蝙蝠」，尤其係喺「蝙蝠洞」，攻力更強，聯賽近6主場均入兩球或以上，借將伊度亞度華加斯亦逐漸融入球隊，呢位技術唔錯嘅智利國腳成為球隊進攻嘅泉源，但要留意今場呢隻「蝙蝠」冇咁硬淨，皆因冇咗主力中堅列卡度哥斯達，隨時畀格蘭納達偷雞成功，而且格蘭納達新借將中堅泰亞高艾羅尼成功令球隊攻力提升，呢位利物浦小將唔只淨係識防守，長傳亦好得，上場小勝貝迪斯1球就係靠佢嘅60碼超遠長傳助攻畀前鋒入波，睇嚟今場大盤有望。

另外，啱啱喺歐聯搏到盡嘅馬德里體育會要作客奧沙辛拿嘅硬淨主場，體力尚未完全復原嘅馬體會讓唔起主隊，捧讓球主勝。最後貝迪斯主場對畢爾包，貝迪斯新帥卡達朗接手後所輸嘅3場都係作客，今場返主場可以試吓博讓球主勝。