紅魔冇霸氣 點贏奧林比？

猪拉多纳

「冰封三尺非一日之寒」，今季步入黑暗期嘅曼聯愈踢愈頹，領隊莫耶斯責無旁貸，呢位「魔頭」今晚領軍喺歐聯16強首回合作客奧林比亞高斯，比着舊時係費爵爺帶隊梗係信心十足。不過紅魔今時唔同往日，霸氣盡失，從未帶隊踢過歐聯淘汰賽嘅莫耶斯有冇能力化腐朽為神奇呀？今場敲1.7倍「讓球主勝」好過！

（有線61、64、201及203、中央5台周三凌晨3:45直播）

曼聯喺1月簽入桑馬達後，原本令人期待可以靠呢件鬥牛兵重振雄風，點知原來靚料去到「爛廚」莫耶斯手上都變「廚餘」，佢竟然將創造力強、腳法細膩嘅桑馬達改造成一部斬波機器，咁咪即係要佢走番香川真司條舊路？由此可以斷定莫耶斯的確無能力領導曼聯呢啲大球會，加上又冇歐戰經驗，試問呢位「費蛇欽點接班人」仲有啲咩「符弗」呢？
桑馬達唔踢得尹佩斯想走

更麻煩係，桑馬達今屆歐聯分組賽曾為車路士上陣，今季唔可以為曼聯喺歐聯披甲，而紅魔依家贏波往往要靠尹佩斯、朗尼等巨星嘅個人能力，不過賽前有消息話尹佩斯對球隊目前狀況好不滿，已經有離心，想快快手喺夏天離隊。況且尼曼查維迪已經講明季尾會走人，艾拉、里奧費迪南、拿尼等等亦盛傳將被踢走，成隊波一盤散沙咁，大家只係為自己前途謀算，唉……
奧林比歐聯常客 主場爆過廠

奧林比亞高斯雖然唔係歐洲頂尖勁旅，但佢哋都係歐聯常客，而且陣中有艾巴加沙等經驗豐富嘅球員，即使1月借番嚟嘅希度華迪斯同射手沙維奧拿都因傷缺陣，但哥斯達黎加新星祖爾甘保實力唔差。況且佢哋喺本土聯賽超晒班，晨早已經為今場比賽部署。最關鍵係，奧林比對上兩屆歐聯都喺主場擊敗過阿仙奴，證明英超球隊去到佢哋地頭都唔係咁易踢，咁曼聯今場贏唔到有乜出奇？
Data King 朗尼分組賽6次助攻

‧曼聯前鋒朗尼喺分組賽交出6次助攻。

‧曼聯前鋒尹佩斯近5場入4球。

‧奧林比亞高斯今季聯賽主場13戰全勝，並轟入43球。
乜都玩錦囊 紅魔孖寶靠得住玩「大」

曼聯今季表現今非昔比，後防無論用咩組合都畀唔到人信心，相信奧林比亞高斯會藉住地利主動搶攻。紅魔只有尹佩斯同朗尼呢對前線孖寶靠得住，前者近5場入4球表現穩定，朗尼打歐聯就特別醒神，分組賽交出6次助攻為球隊之冠，睇怕今場入球唔會少，撐2.1倍入球大。
頂占筍盤：奧林比亞高斯（讓球主勝）