辛尼特單打獨鬥蜜蜂兵技「勝」一籌

猪拉多纳

上星期歐聯踢咗4場16強首回合賽事，客隊全勝兼開出4個上盤。今晚輪到辛尼特迎戰多蒙特，同樣以客隊經驗及人腳較為佔優，大有機會延續上周盤路，一於冷敲3.1倍「讓球客勝」，捧「蜜蜂兵」首回合輕鬆贏波。

（有線61、64、201及203、中央5台周三凌晨1:00直播）
辛尼特歇冬冇態

辛尼特喺G組以6戰1勝3和2負得6分出線，成為晉級隊伍當中分數最少嗰隊。論人腳，侯克、艾沙維、韋素及基斯薛圖件件都係國腳級球員，可惜整體合作麻麻，經常要靠侯克單打獨鬥。而俄超現正係歇冬期，辛尼特球員狀態未必十足。

有多蒙特球迷嫌搭飛機去俄羅斯悶，賽前搞搞新意思改搭火車同船經芬蘭拉彭蘭塔去聖彼得，回程就經愛沙尼亞返德國，仲號召更多「蜜蜂躉」Join埋一齊，多個照應喎！Fans落足心思去撐場，多蒙特當然要畀心機踢好波，雖然佢哋上輪德甲倒灶吞漢堡3蛋，中場施雲賓達更因恥骨發炎被迫休戰10周。不過「蜜蜂兵」歇冬後戰績不俗，前線羅拔利雲度夫斯基同奧巴美揚腳風仲幾順添。加上多蒙特歷來兩次歐戰造訪俄羅斯球隊（93至94球季對阿蘭尼亞、02至03球季對莫斯科火車頭）都贏波，俄羅斯咁旺佢哋博得過。