加拉車仔和味濃

猪拉多纳

今晚兩場歐聯16強首回合，加拉塔沙雷主場鬥車路士，論球員級數，車路士無疑勝過加拉塔沙雷，不過加拉塔沙雷分組賽能壓過意甲冠軍祖雲達斯取得出線權，自然唔可以睇小佢哋嘅地獄主場威力，而且加拉塔沙雷領隊文仙尼曾於英超執教，對英超球隊有一定了解，今場比賽唔係冇得踢。車路士領隊莫連奴老謀深算，尤其應付盃賽特別有心得，首回合打和對佢嚟講絕對可以接受，車路士作客讓波唔值博，個人認為今場好大機會和波，心水波膽為1比1。
皇馬信心爆棚睇高啲

另一場形勢就明朗得多，史浩克04近期喺德甲雖然狀態唔錯，不過呢班波表現好飄忽，踢完幾場好波忽然又會走晒樣，而且去到歐洲賽場，史浩克嘅球員質素及經驗始終差一截，分組賽兩鬥車路士合共吞六蛋就係明證。皇馬近期喺聯賽愈贏愈有，而且上周贏完後仲壓過巴塞、馬體會升上榜首，士氣、信心爆晒棚。球隊冇咗停賽嘅C朗都咁弗，今晚有番呢名應屆金球獎得主喺前線掛帥，試問史浩克點擋！