世界漫遊：靚到爆四班佔優勢

不死鸟

有人話馬場係創造奇蹟嘅地方，一個小小嘅機會，分分鐘可以成就傳頌百年嘅馬壇佳話。同樣係美國著名嘅貝蒙馬場，同樣係騎師布利萊，地點、人物依舊，最近就響短短廿四小時之內，炮製出兩個猶如施咗魔法、令人嘆為觀止嘅贏馬過程。

　　啱啱響上個禮拜五舉行嘅美國橡樹大賽，策騎大熱門Rachel Alexandra贏一條街嘅布利萊，勝利喜悅都仲未過，相隔都唔夠一日，呢位旺人響上個禮拜六貝蒙馬場嘅重頭戲肯塔基打吡，又再上演一幕馬迷奇遇記，夥拍Mind that bird以呢項三冠大賽頭關歷來罕見嘅贏馬姿態捧走錦標。

　　今屆肯塔基打吡，總共吸引咗十九匹北美現役最頂尖嘅三歲馬出戰，由於Mind that bird之前最叻只係贏過加拿大三級賽，所以獨贏賠率冷到50倍，之但係呢匹閹馬跑受天雨影響嘅泥漿地居然異常生猛，雖然出閘後被撞，要留至包尾位置，但係彎位開始就變成呢隻馬嘅單騎表演，貼欄偷位推進，直路初拉出二叠繞過力弱馬匹後即刻移番入內欄殺上，以完全唔同班嘅加速力直奔終點。

肯塔基打吡爆大冷

　　衝線之後，除咗鞍上人布利萊振臂高呼外，全場幾乎鴉雀無聲，可見在場所有人都對呢個賽果感到相當難以置信。

　　由於爆出冷門賽果，各項彩池都爆到七彩，其中四重彩兩蚊注就派成$557,006美元，兌做港幣有成四百幾萬，如果幸運兒能夠買中，響香港足以買番層中價樓，都咪話唔和味。

　　講番聽晚谷草賽事，列陣第二場四班一哩嘅「靚到爆」，二月初時仲響三班賽上名，今次落到四班跑，級數高過一眾對手，用埋楊明綸減多十磅相當好跑，足以在此打開勝門。