歐聯主隊會踢爭氣波

猪拉多纳

上周中歐聯4支主隊全敗，的確令唔少人跌眼鏡，但呢種「主場不利」情況屬於罕見例子，尤其係歐聯呢類高水平賽事，就算係小組次名出線嘅球隊，亦並非不堪一擊。今晚兩場歐聯，牌面較低嘅加拉塔沙雷、史浩克04主場受讓，仍然值得捧場。當中土耳其勁旅加拉塔沙雷「地獄主場」舉世聞名，對手車路士攻力麻麻，領隊莫連奴一向算死草，作客未必去盡，車仔讓平半，下盤高水抵玩。

今日亞冠盃戰線亦備受關注，上屆冠軍「中超曼城」FC廣州（廣州恒大）主場迎戰墨爾本勝利。恒大日前宣布減贏波獎金，結果即刻輸咗中超盃，但經過一段時間消化，球員開始接受現實，而且恒大始終係中國最豪球會，估計球員都想繼續留効。獎金減少之下，意味球員必須更加搏命，爭取贏多幾場，入多幾球，保持收入，隨時更進取。

恒大雖然有中場孔卡離隊，但新加盟嘅意大利翼鋒迪亞文迪具級數，此子傳射能力俱佳，處理罰球亦有一手，配合上屆神射手穆里奇同艾傑臣，恒大攻力有增無減，相當值得睇好。
恒大炒得起墨爾本勝利

至於墨爾本勝利最大問題係防守差，聯賽20戰失32球，淨得球仲係負數，咁都可以位居聯賽第3位，唔多唔少反映澳職水準偏低。事實上，勝利外圍賽主場對泰國球隊蒙通聯，都陷於苦戰，臨尾驚險反勝，但今仗對手係億萬大軍恒大，墨爾本勝利隨時被大炒。

（now 671周三晚8時直播）