鳳凰重生玩謝阿德

猪拉多纳

威靈頓鳳凰堪稱今季澳職最神奇球隊，開季10場不勝，但上年年尾突然大反彈，近10場贏7場，名副其實「火鳳重生」。最難得係呢支新西蘭球隊克服埋作客腳軟嘅弊病，球隊上下現時信心爆棚，今仗作客鬥月初手下敗將阿德萊德聯，仲有得受讓，必捧讓球客勝。

（有線64及203台周四下午4時30分直播）

上季包尾嘅威靈頓鳳凰今季聘請前港隊主帥摩力克執教，由於百廢待興，摩帥需要花一段時間調校，季初成績低迷可以理解。慶幸摩帥嘅工作終於有成果，球隊愈戰愈勇，近10場聯賽取得7勝1和2負，包括月初擊敗阿德萊德聯。近5次作客4勝，已比上季客場勝仗多一倍，踢出近年巔峰。

鳳凰4位中前場球員侯斯甘斯、靴南迪斯、堅尼根寧咸、布洛奇腳風極順，4人今季已合共轟入25球，可以話係目前澳職最強進攻組合。鳳凰現時僅落後第6位中岸水手1分，為搶奪季後賽資格必搏命。
阿德萊德聯後防脆弱

阿德萊德聯由前傑志教練甘巴爾領軍，大踢進攻足球，但同時削弱防守力量，上仗兩度領先墨爾本勝利，最後卻倒輸收場，再次反映防線脆弱嘅問題。「阿聯」今仗仲有後防主力莊拿芬麥簡停賽，情況更令人擔心，恐怕難以抵擋鳳凰進攻4大天王來犯。