亨克換帥沖喜撐上盤

猪拉多纳

歐霸盃比甲亨克主場對俄超安治，Anton喺俄羅斯出生，現居於比利時，對兩軍瞭如指掌，雙方近況都差到冇朋友，不過亨克啱啱換帥可望沖喜，主場出擊有望擊退安治，亨克讓半一宜捧上盤。

（周五凌晨4時05分開賽）

睇番首回合，安治主場同亨克踢成0比0，係Anton近年睇過水準最低嘅歐洲賽事，兩軍同樣欠缺創造力，成場波冇乜埋門鏡頭，簡直悶到抽筋。

亨克喺比甲成績極曳，近12場聯賽輸咗9場，不過上輪聯賽輸波後換帥，由經驗豐富嘅費雷拉代替比恩執教，相信有助球隊反彈，何況亨克向來重視歐霸盃，今仗只要贏波即可打入16強，對呢支小球會嚟講係重大成就，主場必拚。

安治近年因財困不停出售主力，目前喺俄超包尾，踢咗19場聯賽仲未開齋，歇冬期休戰太耐根本冇態，雖然歇冬期引入咗幾名年輕球員救亡，但有力都唔會用喺歐霸盃，今晚作客凶多吉少。