迪尼普唔靠死守熱刺「大」舉反撲

猪拉多纳

歐霸盃今晚另一場32強次回合大戰，熱刺喺首回合收起部分主力遠征烏克蘭，結果輸畀迪尼普0:1，今晚回師主場，領隊舒活話明要反勝晉級，相信會強陣出擊全力搶攻，對手迪尼普亦唔似一味死守等完場，1.77倍入球大值得一試。

（有線61及201、廣東體育周五凌晨4:05直播）
蘇爾達杜失機 艾迪巴約孭飛

講真，熱刺首回合唔係冇攻勢，只係班球員唔爭氣把握唔到，好似射手蘇爾達杜就喺離門5碼失機，否則佢哋有力保住不敗而回。賽前領隊舒活接受球會官網訪問時表明要力爭反勝，預計射手艾迪巴約、中場基斯甸艾歷臣會復任正選，提升數胡能力。

迪尼普主帥桑迪拉莫斯擅長踢盃賽，深知領先一球唔穩陣，加上佢不滿當年熱刺炒咗自己，仲唔乘機喺白鹿徑球場報仇咩！睇怕今晚全軍死守機會唔大，反而希望憑快速反擊爭取作客入球。翼鋒高路比恩卡上個月轉戰英超失敗，今仗實把握機會「騷哥利」，吸引其他英超勁旅喺今夏出手買佢，此子擅長突破而且射門欲強，勢必成為熱刺後防心腹大患。