獅吼撼光輝獻「細」

猪拉多纳

大半季發揮穩定嘅布里斯班獅吼，最近突然失準錄得3場不勝，對上兩場更連續輸畀紐卡素噴射機同墨爾本雄心。佢哋今日下晝喺澳職主場迎戰狀態更沉嘅珀斯光輝，兩軍同樣想止血唔輸波，唔慌踢得進取，2.02倍入球細不妨一試。

（有線64及203周五下午5:00直播）

今個月初獅吼喺聯賽仍有8分領先優勢，正當大家諗住佢哋會全力衝刺提早奪冠，偏偏球隊突然跌Watt，畀次席西悉尼流浪者追近至4分。主帥米克上仗決心求變，收起前仗表現麻麻嘅中場迪奧高費拉拿、柏拉杜斯、魯斯迪卡等三人，改派前鋒軒歷基安達迪、中場麥特麥基同米拿打正選，可惜球隊進攻仍舊欠銳，仲不停畀對手打反擊。即使今次對住更頹嘅光輝，相信獅吼都唔敢搶攻，以免再招敗績。

珀斯光輝近5場輸4場，士氣直插谷底，相信佢哋今場只會以1分為目標。考慮到光輝今季甚少大敗，一心求和嘅話獅吼都未必咁易攻得入。

翻查紀錄，雙方連續5次交手未試過出現多過1個入球，睇怕今場都係悶戰居多。