利華必殺令大起緬恩斯

猪拉多纳

德甲早場利華古遜主場對緬恩斯，利華近期諸事不順，德國盃遭乙組仔淘汰，歐聯對巴黎聖日耳門踢完首回合已陷絕境，近七場聯賽更輸咗五場，難怪會方高層火都嚟埋，今仗賽前操練，體育總監特登走出嚟同球員對話，要求佢哋今晚踢爭氣波，氹番傷心咗好耐嘅主場球迷。

利華教頭希比亞應付三線作戰手忙腳亂，但剛周中同下周中都冇比賽，呢位教頭初頭唔使再心大心細，一於谷到行搶攻，上仗退任後備嘅孫弘民將復任正選，同傑斯寧、悉尼森姆組成三叉戟，佢三個今季合共入咗26球，今仗主場對中游分子當然要強攻吐烏氣。

緬恩斯係小球會，但喺少帥杜曹手上表現長期都有水準，今季中前場引入咗岡崎慎司同具滋哲兩名亞洲兵，啱晒佢哋嘅快速反擊戰術，杜曹喜歡輪換，試吓試吓又有好嘢，年僅20歲嘅中場小將祖漢斯基斯更係今季最大發現，連喺德甲發霉多年嘅喀麥隆前鋒祖普莫亭，今季喺佢手上亦腳風大順，成班波充滿朝氣，今晚作客面對壓力大嘅利華古遜唔係冇得踢。
緬恩斯作客利華例入波

緬恩作客踢法好開放，今季11場德甲作客有9場開出大盤，歷來13次作客利華古遜有12場入到波。利華近兩季主場對緬恩斯踢成3比2同2比2，今季由希比亞領軍首循環作客都贏4比1，今仗入球唔會少。
有線64及203台 周六晚10時30分直播