車仔出齊架生射爆「靶王」富咸

猪拉多纳

力爭倫敦打吡100W

一隊榜首，一隊包艇，車路士雖然攰爆，但為咗鞏固「一哥」席位，今晚喺英超造訪富咸絕對冇失分空間。「藍戰士」一向食慣富咸，費蘭度托利斯亦有番射手觸覺，加埋周中歐聯冇落場嘅「重炮手」尼曼查馬迪復任正選，照計今仗可以砌低「靶王」富咸全取3分，捧2.02「讓客」，撐車路士贏波締造球會英超「倫敦打吡」第100W！

（now621台周六晚11:00直播）

車路士喺周中歐聯16強首回合同加拉塔沙雷打和1:1，大軍喺英國時間禮拜四清晨4點先飛返倫敦，今晚就要急急腳造訪富咸，真係慘過咕喱，怪唔之中場老將林柏特鬼咁勞氣，炮轟英超賽會懶理歐聯代表死活，指今場波應該安排喺禮拜日進行先啱數。不過咁，「林伯」補充話車路士勝在板櫈深度夠，而且後生仔唔少，要應付富咸相信綽綽有餘。
車仔25次對賽僅輸1鋪

事實上，中場指揮官奧斯卡杜斯山度士周中幾乎臨完場先入替，防中尼曼查馬迪同中堅大衞雷斯就冇份踢，為「藍戰士」先拔頭籌嘅費托亦只係踢咗個零鐘多啲，證明領隊莫連奴都留一手，為今場「倫敦打吡」做足準備。最重要係費托鬥加拉場波踢到虎虎生威，昔日嘅射手觸覺返晒嚟，今晚隨時又有「士哥」。

之所以話富咸係「靶王」，皆因佢哋今季被對手射中框嘅次數冠絕英超，足足有173次，要知道車路士中前場大把炮台，富咸門將史基倫堡再好身手，睇怕都瓦解唔晒夏薩特、尼曼查馬迪、伊雲洛域同費托嘅攻勢呀？再講，雙方近25次喺聯賽交手，車路士只係試過輸畀富咸1次咁大把，加上「藍戰士」喺英超已經錄得99場「倫敦打吡」勝仗，今鋪對住富咸呢味「私房菜」要達成「倫敦打吡」100W呢個里程碑，相信冇咩難度。