羅拔仔 奧巴美揚弗爆多蒙特狂鋒拆「紐」

猪拉多纳

德甲勁旅多蒙特雖然已經冇咩機會攞聯賽冠軍，但周中歐聯踢咗漂亮一仗，作客大勝辛尼迪4:2，大大增強咗佢哋今晚迎戰紐倫堡嘅信心。既然箭頭羅拔利雲度夫斯基同奧巴美揚咁好狀態，有力幫隊波大勝一場，1.7倍「讓球主勝」值得捧場。

（有線61、201周六晚10:30直播）
紐倫堡後防核心停賽

多蒙特依家落後榜首拜仁慕尼黑成廿分咁多，爭標早已經投降，上場聯賽佢哋吞咗漢堡3蛋，唔多唔少因為分心去歐聯。既然依家搞掂嗰場歐聯作客硬仗，今晚真係要放番心機落聯賽，事關佢哋依家只領先第5位嘅禾夫斯堡3分，冇咩空間再失分。雖然馬高列奧斯今場停賽，但羅拔利雲度夫斯基同奧巴美揚呢對箭頭近6場狂轟10球，主場肯定大開殺戒！

紐倫堡上場踢少一個反勝布倫瑞克2:1，其實贏得好夠運，皆因對手有兩個12碼宴客。佢哋今季作客拜仁同利華古遜分別輸2球同3球，後防核心柏尼爾遜今場又要坐波監，作客多蒙特睇怕都要大敗一場喇！

順帶一提，今日晏晝開始，有線會繼續直播新一季J.League，以後各位球迷周末日頭睇J.League或者澳職，夜晚睇德甲，唔使出街搵節目啦！
頂占筍盤：多蒙特（讓球主勝）