英軍喪咬丹麥曲奇

猪拉多纳

利物浦小獅生猛出擊

英格蘭太公波檔期約咗丹麥於倫敦溫布萊球場拍跳，英軍主帥鶴臣深知國內大會多線作戰賽程勁密，為免得失各路大軍，佢賽前事先張揚今戰會試陣，唔使兼顧歐戰嘅利物浦群星勢將擔大旗，幾個「紅軍」小獅弗到爆，好過用曼聯班頹星啦！丹麥青黃不接，連當家球星基斯甸艾歷臣都傷埋，無力反抗，熱捧主勝！

（now 621周四凌晨4時直播）

國際賽檔期成日聽到球會同國家隊衝突，鶴臣見今場太公波只係熱身性質，所以都冇諗住精銳盡出：「我一早諗住喺今場試啲嘢，謝拉特同朗尼呢類球員唔使再證明自己啦，可以畀其他人踢吓。」鶴臣早前喪讚利物浦射手史杜列治好波，預期前線會搵佢做膽，有機會拖埋史達寧及佐敦軒達臣組成利物浦鐵三角，「紅軍」近排咁順，呢三隻弗爆小獅絕對唔好惹。

英格蘭呢次最令人期待嘅新面孔係左閘勞基梳爾，英軍左路兩大天尊A高同巴尼斯曾幾何時被視為世盃鐵腳，但呢個修咸頓小將火速上位，攻守力不遜兩個老大哥，今次係佢騷哥利爭位嘅良機。防線中路係「三獅兵團」最大隱憂，鶴臣死都唔肯重召泰利，現時菲臘積基爾卡同菲爾鍾斯都有傷，今戰隨時要用基斯史摩寧夥拍加利卡希爾，對丹麥算係夠砌啦！
丹麥王牌長坐阿仙奴冷板

丹麥於世界盃外圍賽成為最差第二名，痛失入場券，呢隊波係就係實而不華，但人腳真係麻麻，王牌射手賓特拿只係阿仙奴第三號前鋒，排位仲後過法國小將耶耶辛洛高，佢今季英超上陣時間僅得82分鐘，打過一次正選咁大把，雪到硬晒，作用有限。現時丹麥只得進攻中場基斯甸艾歷臣較有卡士，依家連佢都傷埋，睇怕今戰都係捱打，放心捧對家啦！