比利時科特迪瓦鬥入波

猪拉多纳

歐洲新貴比利時於今晚熱身賽主場迎戰非洲勁旅科特迪瓦，比利時雖被視為今夏世盃一路奇兵，不過近期熱身賽戰績麻麻，值得欣慰係一眾前鋒近期喺球會賽事腳風都好順，遇上同樣擅攻嘅科軍，相信會有唔少入球出現，投X首選入球大。

（無綫翡翠台周四凌晨3時45分直播）

比利時近年人才輩出，而且經傳媒熱捧後大家對佢哋實力已好清楚，不過球隊對上兩場先後不敵哥倫比亞、日本，應付熱身賽戰意一般，尤其上次面對採取壓迫性踢法嘅日本，後防更加錯漏百出失三球，今戰屬可勝不穩格局。前鋒盧卡古上周末於英超傷愈復出，即為愛華頓攻入奠勝一球擊敗韋斯咸，另一射手賓迪基亦喺阿士東維拉擊敗諾域治一役梅開二度，包括一記精彩絕倫嘅倒掛金球，配合擅於鑽營嘅夏薩特、米拿拉斯、奇雲迪布尼等，進攻瓣數甚多。
科特迪瓦有前冇後

科特迪瓦前鋒杜奧巴老而彌堅唔在講，而且其他前鋒近期狀態亦好弗，効力法甲里爾嘅沙洛文卡勞剛於聯賽演出帽子戲法，曼城中場耶耶托尼喺英聯盃決賽亦射入世界波助球隊捧盃，何況羅馬謝雲奴、史雲斯韋菲特邦尼今季於所屬聯賽亦有好表現，論攻力絕對拍得住任何一流勁旅。科軍對上八場國際賽場場有波入，不過同時間亦一共失咗十五球咁多，踢法有前冇後，入球大係今仗投X首選。