出線關鍵戰國足唔怕克

猪拉多纳

亞洲盃外圍賽最後一輪分組賽上演，C組出線關鍵戰役會於阿聯酋舉行，由伊拉克決戰中國。國足唔輸就可躋身決賽周，新帥比連未正式領軍，但已親自指導將士備戰，非常落力，只要國足做好防守，有力頂住對手，獲受讓博讓球客勝！

（周三晚10時開賽）

中國落實任命法籍教頭比連為帥，佢最威水係07年帶過法國班霸里昂，今次應邀執教國足，唔少球迷期待佢幫球隊「升呢」。

比連接掌球隊冇耐，仍未熟悉隊員，今戰球隊仍由傅博帶隊，比帥練波時已從旁提點，特別要求中場球員提高反擊速度，佢於訓練期間更走上看台睇吓有冇伊拉克間諜，堅有經驗。
伊拉克失地利大換血

睇返今次國足名單，亞洲王者廣州恒大後防三子曾誠、張琳芃同孫祥因傷停缺陣，成為最大隱憂，老大哥鄭智勢將移後鎮守後防，而郜林就肩負士哥重任。伊拉克背水一戰大換血搏殺，對比上次作客中國輸0比1陣容，只保留10個球員，星級射手尤尼斯仍在陣中，但由於安全理由繼續冇得於主場作賽，唔易撕破對手防線。
B組黎巴嫩「大」起泰國

B組黎巴嫩爭取以最佳第3名成績晉級，作客泰國會傾力搏殺。黎巴嫩目前比起競爭對手伊拉克少一分，若對方失分而自己贏波，咁就可以趕過伊拉克。而黎巴嫩落後中國3分，球差輸緊6球，如果黎軍大勝而國足大敗，佢哋亦可取得入場券，今戰肯定喪攻泰國，入波必多，捧入球大！