德國試陣大駁火

猪拉多纳

智利有料到唔怕鬥攻

國際熱身賽上演「歐美」大戰，由德國主場迎戰智利，比賽將於斯圖加特嘅維爾廷斯球場上演，今場係德甲收咧前國家隊最後一戰，領隊勒夫選入四名新兵，擺明試陣為主，面對實力一啲都唔弱嘅智利，主Ｗ熱到1.35倍實在有啲過分，基於雙方都攻強守弱，踢法主攻，今場最穩陣係捧大盤。

（now 633周四凌晨3時45分直播）

勒夫今仗征召咗漢堡22歲射手拉蘇加、弗賴堡20歲中堅馬菲亞斯真達、森多利亞21歲後衞梅斯達菲同奧格斯堡23歲進攻中場安達夏恩四名新兵，唔好以為係獎勵性質，由於傷兵較多，呢批小將喺各自聯賽又確有出色表現，今夏隨時成為國家隊雷霆救兵，尤其箭頭拉蘇加更被睇好，今晚會有機會落場一顯身手。
和西殺英 名牌剋星

德國陣中幾名防守中場包括基迪拉、根度簡同施雲賓達都因傷缺陣，勒夫或會排出拜仁正副隊長拿姆同舒韋恩史迪加首次喺國家隊合演雙防中，兩人派牌技術同樣到家，球隊踢法更具攻擊性，加埋啱啱喺英超為車路士連中三元嘅快翼舒賀爾尼，火力依然十足。

睇今場賠率，Alwin認為智利明顯被低估，呢班波實而不華，大牌球星唔多，但逾半數球員都喺巴甲球會擔綱主力，陣中兩名最大牌球星當然係祖雲達斯嘅中場重心維達爾，同巴塞隆拿箭頭阿歷斯山齊士。佢哋去年底熱身賽就和過西班牙同贏英格蘭，就算今夏世界盃抽入死亡之組面對西班牙同荷蘭，Alwin相信佢哋仍然有生機，球隊喺阿根廷籍教頭林柏奧利帶領下大踢進攻足球，今晚會繼續排出4-3-3陣式同德軍駁火，入波唔會少！