邊緣國腳爭位捧日本-1

猪拉多纳

今晚有多場熱身賽上演，其中亞洲勁旅日本喺主場迎戰新西蘭。日本隊今次點兵雖然有部分常規球員唔在陣，但其他戰將都有番咁上下質素，加上對手新西蘭實力真係麻麻，睇嚟日本今場可以輕鬆擊敗新西蘭，細鬼睇好讓球主勝可順利開出。

（有線61及201台周三晚6時40分直播）

今場熱身賽係日本隊喺東京國立競技場改建前嘅最後一戰，所以無論球員定球迷都想留個美好回憶。日本隊今次徵召咗包括本田圭佑、長友佑都及香川真司等外流球星，即使常規國腳好似長谷部誠同內田篤人避戰都無損卡士。
新西蘭級數不足

日本隊今仗選咗唔少邊緣國腳，好似山口螢、工藤壯人及豐田陽平等。佢哋為求出征巴西世界盃，相信會全力以赴爭取好表現，唔使怕佢哋Hea踢。

新西蘭早前喺世界盃外圍賽附加賽兩回合慘遭墨西哥蹂躪，今次面對實力差唔多嘅日本，相信更難應付。而且日本早前更曾逼和荷蘭同贏過比利時呢啲名牌，今仗主場面對差一班嘅新西蘭，細鬼認為佢哋起碼贏兩球，一於捧讓球主勝。