巴西強陣勢劏南非

猪拉多纳

世盃決賽周東道主巴西今晚熱身賽作客鬥南非，巴西作為主辦國，為練兵每場熱身賽都搏到盡。南非運動員跑步就叻，踢波仲未夠資格和足球王國相提並論，讓球主客和巴西讓一球，熱捧讓球客勝。

（TVB 301周四凌晨1時直播）

巴西決賽周有主場之利，肯定會被列強視為最大假想敵，而且去年擊敗西班牙贏得洲際國家盃冠軍，已經盡顯爭標本錢，所以佢哋根本冇需要保留實力，反而傾向透過熱身賽去試陣，故此每次態度都好認真。自去年八月意外輸畀瑞士後已連贏六場，其中有五次都能淨勝對手兩球或以上。今次點兵尼馬、侯克、費特、奧斯卡杜斯山度士及韋利安等主力都有份入選，進攻火力冇減弱。

南非對上一次於主場踢熱身賽曾爆冷擊敗上屆世盃盟主西班牙，不過西班牙近年熱身賽表現一般，面對赤道畿內亞、白俄羅斯等弱旅都係小勝，所以南非贏到佢哋唔代表好叻。南非上場非錦賽對尼日利亞上半場已落後兩球，今次面對攻力更強嘅巴西隨時輸得更快，除捧讓球客勝之外，半場客勝亦值得捧場。