比利時 科特迪瓦首度交鋒做大騷

猪拉多纳

提起今屆世盃爭標分子，比利時絕對係唔少球迷心水之一，皆因佢哋人腳實力、經驗俱備，今晚主場迎戰科特迪瓦，既然兩隊中前場火力十足，有力炮製一場入球騷，1.95倍入球大不妨一試。

（無綫翡翠台周四凌晨3:45直播）
夏薩特孭飛硬撼杜奧巴

今晚係呢兩隊波史上第一次交手，喺首都布魯塞爾出擊嘅比利時，當然唔想喺超過6萬名鄉親父老入場支持下失威啦。而且佢哋對上一輪國際賽檔期連輸畀日本同哥倫比亞，今仗肯定唔敢再掉以輕心，以盧卡古、夏薩特為首嘅鋒線，足以撕破對手防線。

對手科特迪瓦賽前傳出足總唔滿意領隊林武治表現 ，諗住喺世盃後改由意大利籍教頭查帕東尼執教鞭，不過呢支非洲勁旅隨即否認有關消息穩定軍心，林武治仲講明自己會以呢場比賽做藍本，敲定出戰世盃最後名軍，相信主力杜奧巴、謝雲奴、沙洛文卡勞都唔敢Hea踢。加埋今季罰球表現大躍進嘅王牌中場耶耶托尼壓陣，要延續「大象兵團」連續10場有波入嘅紀錄唔難喎。