英格蘭搏命砌丹麥

猪拉多纳

「鶴臣實驗室」揀蟀

今晚國際熱身賽好戲碼勁多，其中一場係英格蘭喺溫布萊球場恭候丹麥。「三獅軍團」踢埋今場友賽，跟手就會公布世盃決賽周終極大軍名單，換句話講，今晚既係領隊鶴臣最後閱兵，亦係勞基梳爾、史達寧等國家隊新丁爭取表現攞入場券嘅最後機會，面對鬥心成疑嘅丹麥，2.6倍「讓主」抵博。

（now621台周四凌晨4:00直播）

「三獅軍團」主帥鶴臣喺賽前講明會做「實驗」：「我用謝拉特做例子，呢位擁有108頂喼帽嘅國腳，有冇必要透過今場波去證明自己實力？」查實鶴臣口中所謂嘅「實驗」，咪即係畀多啲機會班後輩，睇吓邊個拍邊個會有「化學作用」囉。

雖然睇番大軍名單，英格蘭唔係用最強陣容出戰，但筆者覺得咁樣反而仲好，事關比起昔日「三獅兵」身嬌肉貴勁錫身，如今鶴臣走務實路線，唔睇名氣，徵召大量有潛質嘅修咸頓同利物浦球員，列基林拔、拉爾拉拿、積洛迪古斯等有機會踢國家隊，肯定勁搏命啦！
勞基梳爾入選激動到喊

仲有呀，「聖人」左閘新星勞基梳爾知道自己首度入選後，向阿媽報喜嗰陣仲激動到喊，今後仲唔當「科學家」鶴臣神咁拜咩？

係，熱刺球星基爾獲加受傷倦勤，但都有經驗豐富嘅格連莊臣頂替右閘位，佢嘅紅軍隊友佐敦軒達臣、史達寧同史杜列治雖則喺英超響晒朵，但去到「三獅軍團」則仍然係「初哥」，為咗搭上世盃列車，呢場波肯定當決賽咁踢！

相反，冇份踢世盃決賽周嘅丹麥，為備戰9月開打嘅2016年歐國盃分組賽，5月兩場熱身賽鬥匈牙利同瑞典至係「戲肉」，今戰旨在Hea練睇吓辦，更何況被教頭摩頓奧臣捧到上天嘅基斯甸艾歷臣，因為背傷冇份入選，圖盧茲次席射手巴夫韋迪又喺日前賴嘢被迫退隊，前線齋靠件「中堅賓」賓特拿擔大旗，點信得過呀﹖
Data King：紅軍孖寶喪入波

‧丹麥近11場比賽只得3場保持不失。

‧「紅軍孖寶」史杜列治與史達寧近10場波聯手貢獻13球。

‧英格蘭近8次主場出戰，合共製造16個入球。
乜都玩錦囊：三獅「雙史」做「大」事

英格蘭「雙史」史杜列治同史達寧喺利物浦表現弗爆，最近10場波夾手夾腳攻入13球，今場面對防線唔算穩陣嘅丹麥，入波隨時易過食生菜，1.92倍「入球大」博得過。