巴西「讓和」非跟不可

猪拉多纳

4次對賽均贏1粒

巴西貴為5屆世盃盟主，又有尼馬等球星孭飛，肯定係票房保證。南非足總會長丹尼佐敦醒水呀，早排打友情牌搵舊帥彭利拿鋪橋搭路，約到「森巴兵團」今晚喺約翰內斯堡拍跳，呢場友賽睇落強弱懸殊，實情巴西歷來未試過大炒南非，3.85倍「讓和」值得一博。

（TVB301周四凌晨1:00直播）
彭利拿搭路幫南非足總賺錢

彭利拿曾經率領南非出戰2010世盃，丹尼佐敦同佢好Friend，所以就託呢位巴西國家隊技術總監安排友賽，一來練吓兵，二來掠番筆門票收入，一舉兩得。巴西踢完今仗之後，決賽周前就只係得番6月鬥巴拿馬同塞爾維亞兩場熱身賽，所以領隊史高拉利都嚴陣以待，今鋪徵召咗尼馬、侯克、奧斯卡杜斯山度士同丹尼爾等骨幹出擊，人腳超晒班。
南非遇強隊好少大敗

不過咁，巴西歷嚟4次鬥南非係就係贏晒，但4場波全部僅贏1粒，加埋南非上年11月友賽試過爆冷砌低西班牙，證明佢哋鬥強隊唔會腳軟。

況且，南非喺非洲區外圍賽表現令人失望，入唔到今年巴西世盃決賽周，到年頭佢哋又喺非洲錦標賽小組出局，今次點都要喺自己地頭做番齣好戲，相信就算輸都唔會輸得太肉酸。