國足關鍵戰例甩轆捧伊拉克有着數

猪拉多纳

雖然和波就出線，但係中國男足向來習慣喺關鍵時刻甩轆，今晚佢哋响亞洲盃外圍賽C組謝幕戰，出師阿聯酋夏爾迦中立場硬撼伊拉克，受讓平半都不宜睇得太高，掉轉要伊拉克上盤就差唔多。

（開賽時間：周三晚10:00）

目前C組嘅沙特已經率先出線，剩低一個直接晉級席位，就由中國（8分）同伊拉克（6分）爭奪。形勢上中國係有利，因為佢哋和都掂之外，就算輸波都可能以最佳成績第3名打入澳洲決賽周，難怪中國足協都雄心勃勃，早兩日學廣州恒大咁出咗張宣傳海報，有個國腳一腳省個波去咗澳洲國旗，盡顯佢哋嘅出線信心。
下任教頭比連提早「干政」

中國足協呢次係自信嘅表現，定係東施效顰？今晚自然有分曉。不過由過去經驗睇到，國足每到重要關頭唔係發軟蹄就發傻，對住非勝不可嘅伊拉克，可能會「自殺式」輸波，何況今場孫祥、張琳芃兩件後防大將坐波監，龍門曾誠又傷埋，要臨急Call咗王大雷歸隊頂檔，條後防線變動幾大吓，完全畀唔到人信心。

無可否認，國足今晚話明係由傅博繼續做主帥，但係下任波士法國佬比連已經跟住隊波，據講話畀咗唔少備戰意見添，喺呢個時候整架雙頭馬車係咪好事，大家心照。

最重要係中國近6年對伊拉克冇乜優勢可言，總體上仲係對方有3勝1和2負秤先啲添，呢場「C組決戰」都係博伊拉克上盤穩陣啲，否則足智彩個主W唔會由前日嘅2.12倍，微調到2.1倍嘅。