睇吓寸王點寸舒活佛!

猪拉多纳

心理戰喺足球界有着重要作用，差唔多所有高手都極為擅長心理。今日就想同大家講吓呢種武功，主要分為兩派，一攻一守。攻者即主動出招，唔理乜嘢，只要影響到自身發揮，一律會出招打擊。當中費格遜執教曼聯27年，心理戰已經達到神級，所有麾下球員都會被佢催眠下發揮出120%力量，到比賽時一有不順，費Sir更會大開「風筒」，力求吹到所有球員都上身為止。

守者則為忍受力極強者，今季代表人物都算熱刺領隊舒活，由頂替保亞斯嘅第一天起，球會主席日日都話搵第二個頂佢個位，日日都畀人提醒自己只係替工，難得係呢位替工默不作聲唔反擊，耐心頂住所有壓力，總算令球迷同主席都開始收聲，佢百忍成金，就快可以改名做舒活佛。

但講到心理戰掌門人，一定係車路士主帥莫連奴，佢一出聲必定帶着殺機，遠嘅唔講，今季阿仙奴帶頭嘅日子，佢就日日講兵工廠領隊雲格帶咁耐都冇獎盃，仲有得續約真幸福，明讚暗踩，之後到曼城上位，佢就話人哋先係大熱， 今年聯賽車仔唔諗住贏，搞到曼城隊長高柏尼都叫佢收聲。除咗鬧人勁，「寸王」忍耐力亦係神級，喺皇馬時曾經提早入場畀球迷鬧餐勁，都係為咗令麾下球員安心踢波。今個星期車仔主場硬撼熱刺，我已經等緊聽「寸王」點寸舒活。大家唔會錯過吧！

（now 621周日凌晨1時30分直播）