霉帥大戰西布朗唔赦曼聯

猪拉多纳

霉帥大戰，撐梅爾掃走霉運﹗英超頭場戲碼西布朗主場迎戰曼聯，西布朗主帥梅爾上任兩個月以嚟未嘗一勝，已經聞到魷魚香，不過西布朗出咗名係強隊殺手，多支前列球隊都試過喺山楂球場失分而回，今場對住霉咗大半季嘅莫耶斯所帶領嘅曼聯，至少有望搶到1分，科娜一於捧讓球主勝﹗

西布朗依家護級形勢危危乎，梅爾帥位更極速面臨被炒，佢要保住份工，今場就一定要搶分而回。雖然梅爾仲未帶領西布朗贏過波，不過至少佢帶隊嘅四場主場賽事都未輸過，當中三場更係對住車路士、利物浦同愛華頓，可見西布朗仍然保持住「遇強越強」嘅特性，對住季初作客都贏到嘅「紅魔鬼」，西布朗更係冇有怕﹗
莫耶「輸」強弩之末

至於另一霉帥莫耶「輸」今季將曼聯變成強弩之末，聞到魷魚香仲耐過梅爾，即使佢日前向曼聯擁躉寫「求情信」，呼籲大家齊心對抗逆境都係冇用，「紅魔鬼」已經畀佢搞到冇晒以往嘅「魔」性，球員冇晒鬥志，新買番嚟嘅貴價技術型中場桑馬達雖然啱啱攞到球隊二月份最佳球員，但喺莫耶「輸」獨沽一味斬波戰術之下毫無用武之地，真係睇唔到曼聯今晚有咩勝算，科娜都係揀主隊好過嘞﹗
now 621周六晚8時45分直播