皇馬BBC火力勁到雲

猪拉多纳

今晚賽事多籮籮，阿King見到上周中皇馬BBC（賓施馬、加里夫巴利及C朗）鋒線火力全開咁恐怖，梗係要繼續跟進喇！佢哋今晚喺西甲坐鎮主場迎戰傷停滿營嘅「小蝙蝠」利雲特，相信可以大炒一場，就算讓兩球都照讓球主勝。

（now 632周一凌晨2時直播）

上周中BBC各自返國家隊踢熱身賽，依然有料到，C朗梅開二度榮膺葡國士哥王，賓施馬窩利抽入靚波，加里夫巴利更喺後半場開始帶波狂爆60碼，連過幾關怒射破網，呢個神級金球只用咗10秒便完成，真係遇神殺神、遇佛殺佛。就算主帥安察洛堤想輪換一下，後備席仲有新紮師兄謝斯洛迪古斯蠢蠢欲動，無論「肥安」出BBC定JBC，鋒線一樣咁堅。雖然利雲特近四仗未輸過，包括作客和蘇斯達及戰勝西維爾，但「小蝙蝠」既無降班危機，要爭歐霸入場券亦有難度，處於踢風流波狀態，對住強隊未必會搏，況且佢哋有兩大防中柏巴高尼迪奧普及施馬奧馬迪停賽，守將赫達洛達斯亦因傷上陣成疑，隨時令防線中路大開，頂唔住要力保榜首位、周中又冇後顧嘅皇馬，「銀河艦隊」淨勝三粒冇難度。

至於意甲早場祖雲達斯主場對費倫天拿，祖記中場主將維達爾今仗復出，一對前鋒洛蘭迪、泰維斯又弗到爆，由於雙方於周中歐霸再度交手，一心喺盃賽發圍嘅費倫天拿或會留力示人以弱，不妨直取讓球主勝。

（TVB 301周日晚7時30分直播）