武里南聯銀彈打鐵

猪拉多纳

泰國曼城迎縮皮韓軍

亞冠盃E組上演大豪客鬥窮光蛋戲碼，「泰國曼城」武里南聯主場對住南韓褪色勁旅浦項制鐵，主隊上屆亞冠盃殺入八強贏盡口碑，新季以銀彈打造強大陣容，足以砌到兩隊波應付多線作戰。反觀浦項制鐵續用全韓班政策，仲縮皮放走幾個主力，降晒呢冇料到，平手盤捧主隊！

（now 671周二晚7時直播）

現時亞冠盃行緊「3外援1亞援」政策，正路每隊搵四個外援夠數，武里南聯竟簽夠八個，索性聯賽同亞冠盃分兩隊踢，堅有米！佢哋精心挑選強援征戰亞冠盃，西班牙攻擊球員卡美路踢過希杭，新箭頭積森遜則屬阿仙奴青訓產品，上季假假哋掛名効力侯城，加上由拉科魯尼亞撬走守將洛查拿，三線各有一員猛將帶住班波，堅有料到！
三箭整裝強射水手

浦項制鐵去季以全韓班稱霸韓職，新季繼續冇「鬼」用，但會方竟先後放走盧炳俊及朴成鎬等主將，季前轉會仲要零支出，擺明莫財要縮皮！浦項制鐵曾於97、98及09年三度稱霸亞洲，被視為南韓之光，但呢啲都係「咸豐年嘅事」，家陣班波戰鬥力大減，已淪為亞洲二線球隊，作客惡唔出樣，平手盤要武里南聯。

同日F組日職王者廣島三箭作客澳職大軍中岸水手，三箭今季失去門神西川周作，但冇影響整個架構，攻守仍然對辦，教頭森保一仲將守將鹽谷司改造成出擊後衞，連續兩場靠佢士哥奠勝。水手後防崩潰喪失波，對上七戰輸六場，頂唔住三箭全方位進攻，捧客勝！

（now 670周二下午4時30分直播）