巴黎夜戰細味利華

猪拉多纳

PSG4球在手歎慢板

今晚另一場歐聯16強次回合，巴黎聖日耳門（PSG）主場對利華古遜，幾乎已變成例行公事，皆因聖日耳門首回合贏4比0，晉級機會高唱入雲，教練白蘭斯或會留有一手，甚至讓部分主力休息，更有效分配兵力，力爭成為三冠王，預料呢支法甲豪門會歎慢板，保持領先優勢。利華古遜實力低一班，而且眼見大勢已去，亦唔會作無謂掙扎，慳番啖氣踢德甲，力保下屆歐聯入場券好過，雙方爭勝意欲不足，一於博2.3倍入球細。

（有線62及202台周四凌晨3時45分直播）

聖日耳門首回合作客輕鬆炒利華4蛋，凸顯兩軍實力存在好大差距，但唔代表呢支億萬大軍今仗會繼續狙擊，畢竟球隊最大目標係囊括法甲、法聯盃及歐聯三大錦標，既然歐聯戰線暫時無憂，應會將重心放番喺聯賽。
例行公事兩軍或出副選

尤其係聖日耳門有8位主力曾出戰上周中國際賽，加上嚟緊周日法甲迎戰前列強敵聖伊天，今仗成為抖氣嘅好機會，唔好期望佢哋會踢出水銀瀉地嘅攻勢。

利華古遜唔止未夠班同聖日耳門抗衡，而且本身狀態亦陷入低谷，連盃賽在內，已連續6場未贏過，包括德國盃被乙組仔凱沙羅頓淘汰，以目前頹勢，點可能喺聖日耳門身上搵到着數。利華喺德甲前四位置仍然未穩陣，下仗更要惡鬥拜仁慕尼黑，權衡輕重之下，放棄已無法挽救嘅歐聯，專注聯賽亦好合理。利華今仗人腳唔齊，後衞史柏希斯停賽，中場希格拿、羅比古斯因傷倦勤。估計聖日耳門可小勝，但主W熱爆冇肉食，細盤可取。
Player Browser：悉尼森姆

利華古遜一對前鋒孫弘民、傑斯寧陷入入球荒，如果想破蛋挽回些少面子，好可能要靠悉尼森姆，呢位26歲快翼踢法極具侵略性，今季德甲已有8球進帳，僅次於首席射手傑斯寧。悉尼森姆將於下季轉投史浩克04，臨別依依，當然希望留下美好回憶。
歐聯密碼

3:聖日耳門首回合上半場領先3比0，係今屆16強半場最懸殊比數。

5:聖日耳門過去5次主場鬥德甲球隊未輸過，取得4勝1和。

10:聖日耳門前鋒伊巴謙莫域今屆已入10球，其中3場主場分組賽皆有士哥。

14:聖日耳門過去14次於兩回合淘汰賽首回合作客贏波，全部都能順利晉級。