勝利汽車鬥攻演入球騷

猪拉多纳

亞冠盃G組另一場賽事，澳職墨爾本勝利主場對南韓球隊全北汽車。主隊勝利成績飄忽，但其實亂中有序，幾乎每場都上演入球騷，近10戰9次開大。全北汽車狀態銳不可當，矢志同風頭躉廣州恒大爭一日之長短，遇上被視為呢組最弱嘅勝利，絕對唔會放過搶分良機，作客照攻，首選入球大。

（now 671周三下午4時30分直播）
勝利擺陣頭重尾輕

墨爾本勝利踢法充滿娛樂性，可以話抱住有前冇後嘅大無畏精神，一味主攻。最精彩肯定係上輪分組賽，作客上半場竟然領先恒大兩球，令唔少人跌爛眼鏡。事實上，勝利人腳「頭重尾輕」，精銳猛將都係中前場球員，包括曾効力荷甲勁旅燕豪芬嘅射手艾奇湯臣，仲有今季澳職已有10球進帳嘅杜羅奧斯。因此，教練梅斯卡特每場都盡量發揮進攻強項。

全北汽車曾奪06年亞冠盃冠軍，11年亦打入決賽，上屆分組賽兩戰廣州恒大都保持不敗，斤両十足。首輪即大炒橫濱水手3比0，盡顯霸氣，更何況今仗對手只係實力稍遜嘅墨爾本勝利，相信全汽會放膽反客為主，以3分為目標，有利製造入球。