韋根當旺主Ｗ依絲執

猪拉多纳

今日焦點當然係兩場歐聯，不過阿King認為兩場主隊首回合領先咁多，戰意未明下難以用嚟玩過關，所以轉向英冠埋手。依家英冠最具話題梗係韋根啦，喺英足盃8強淘汰曼城成為一時佳話，球隊個勢咁旺，梗係趁機搶多啲分，力爭升班附加賽資格，主場對中游嘅錫周三，主Ｗ手到拿來。

（周四凌晨3時45分開賽）

韋根殺入足總盃4強，唔好淨係話曼城踢得曳，如果韋根本身冇把握好呢個良機，勝利亦輪唔到佢哋。韋根依家可以疊埋心水喺英冠搏殺，佢哋暫時排第七，同第六嘅雷丁同分，比第五嘅諾定咸森林少三分，但比兩隊均少踢兩場，換句話講失分較少，今場贏波搶入前六，爭升班附加賽資格形勢就大好。

事實上，韋根已經六連勝，打順條氣連億萬大軍曼城都唔驚，主場對住錫周三毫無壓力可言，呢場Ｗ係過關穩膽。
查爾頓伯明翰立立亂要反

另一場就要反上周英足盃出局嘅查爾頓，佢哋輸咗畀英甲嘅錫菲聯，主帥基斯鮑維當地時間尋日朝早落鑊，球會並冇公布邊個接手，今場主場對哈特斯菲爾德，呢支英冠榜末球隊究竟由邊個帶都未知，所謂「蛇無頭不行」，查爾頓仲要讓波，梗係揀讓球客勝。最後揀埋場伯明翰對般尼，隨住前班主楊家誠鋃鐺入獄，球會立立亂，般尼趁亂作客可搶三分，讓平半揀上盤。