PSG雙箭射爆「藥煲」

猪拉多纳

咪睇巴黎聖日耳門歐聯16強首回合拎住4個作客入球，就以為佢哋今晚返到主場會Hea踢，實情教頭白蘭斯一早為今仗留晒力，箭頭伊巴謙莫域落到場亦例牌搶韁，對住前線搵唔到食、中後場又唔齊章嘅利華古遜，2倍「讓主」咪錯過。

（有線62及202周四凌晨3:45直播）

PSG喺上星期六法甲作客3:0淨勝巴斯蒂亞，教頭白蘭斯已經為今場做晒「準備工夫」，全程將隊長堤亞高施華放喺後備之外，中場拉比奧特同馬高華拉堤喺下半場中段亦被收起，換入馬度迪同卡比耶落場舒展筋骨，呢班歐聯骨幹球員今晚上陣搏殺，唔使怕佢哋會莫氣。
卡雲尼歸隊

更何況箭頭伊巴謙莫域副偈行到順晒，踏入新一年14場波勁入15球，呢支瑞典神箭每逢歐聯更慣性自動波去盡，除咗喺首回合梅開二度，之前分組賽鬥安德列治更試過食大四喜，日前因為搞離婚官司飛返烏拉圭嘅卡雲尼，亦都返咗球會報到，今場撞正利華中堅史柏希斯停賽，兩人落到場肯定搶得就搶啦！

至於利華古遜最近由「藥廠」變「藥煲」，話就話做緊德甲「三哥」，但自從上月中德國盃被乙組仔凱沙羅頓淘汰後，戰績直線下滑，聯賽鬥幾支前列分子史浩克04、禾夫斯堡同緬恩斯統統輸波，上輪造訪中下游嘅漢諾威亦喺領先下被逼和，近況真係差到痹。
利華三線唔齊章

最弊嘅係利華中場拿斯賓達拉傷小腿肌肉今戰未必落到場，希格拿更證實腳踝韌帶撕裂，或要提早收咧，就算小將安利簡恩坐完波監復出，亦絕唔夠彌補前兩者嘅空缺。雖然教頭希比亞話唔會放棄，如果放棄嘅不如派U23出去踢！不過佢哋首回合主場出齊傑斯寧、孫弘民同悉尼森姆三箭齊發都冇咩威脅，今場前赴法國鬥近27戰歐洲賽主場未輸過嘅PSG，可能出乜嘢人都分別不大，一個唔少心仲可能重蹈兩年前歐聯16強次回合作客魯營輸7個1皮嘅覆轍。