全意對決細盤啱數

猪拉多纳

歐霸盃16強首回合「全意」對壘，祖雲達斯於主場迎戰費倫天拿。祖記喺意甲超班，亦啱啱喺上仗聯賽擊敗今場對手費倫，首回合先拔頭籌機會甚高，但主W熱到得1.29倍冇肉食，考慮到淘汰賽關係，雙方都唔會太冒進，尤其係費倫天拿應會主守求不敗，等次回合返主場再同你死過，預料會係一場攻防戰，建議玩1.9倍入球細。

（有線64及203台周五凌晨4時05分直播）

祖雲達斯現時喺意甲拋離次席羅馬一條街，基本上揸住半隻盃耳，可全心全意爭歐霸盃。不過意甲球隊踢盃賽保守見稱，尤其係去到淘汰階段，稍有不慎隨時翻唔到身，更加會步步為營。祖記上圈兩鬥土耳其球隊特拉布宗，都係小勝2比0，而且領先後即拖慢比賽節奏，充分表現計到盡嘅意式風格，唔好期望佢哋會大炒費倫。
費倫死守返主場搏過

費倫天拿雖然近況欠佳，但上仗聯賽作客都只係小負祖記0比1，並唔失禮，起碼信心唔輸得晒。事實上費倫今場唔大敗，次回合返主場仲有價講，估計教練蒙迪拿會專心防守。往績上，祖記近6次主場對費倫，有5次開細，1.9倍入球細抵玩。