阿爾克馬爾明恰安治

猪拉多纳

另一場歐霸盃16強首回合，荷甲阿爾克馬爾主場迎戰俄超安治，阿爾克馬爾對歐霸盃極為重視，難得抽得上上籤，對8強席位志在必得，今場炒得起得個守字嘅安治，阿爾克馬爾讓半一，Anton推介上盤。

（周五凌晨4時05分開賽）
主強客弱夠贏兩粒

Anton喺俄羅斯出生，對祖家球會安治素有跟進，呢支曾係暴發戶球隊，目前經已家道中落同星散，目前喺俄超仲係包尾大幡，之所以能夠打入歐霸盃16強，都係多得上圈對手比利時亨克比佢哋更差，事實上安治對亨克嘅兩回合賽事，係我近年睇過最低水準嘅歐霸盃比賽，安治歇冬後表現有啲起色，但目前首要任務係護級，歐霸盃遇勁敵未必肯全心全意去搏。

阿爾克馬爾目前喺荷甲只排第7，但呢班波一向靠主場搵食，單計主場成績排荷甲次席，既主強客弱，亦攻強守弱，遇上強隊經常被炒，但遇弱旅又可以開殺戒，近期佢哋喺荷甲接連大炒華域克同荷華高斯，兩仗共轟入8球，球隊喺荷甲無力挑戰錦標，所以對歐霸特別重視，上圈淘汰捷克班霸利巴域甚具說服力，今晚遇弱旅安治，Anton相信有力贏兩球或以上。