今個星期唔燈熱刺對家!

猪拉多纳

上星期寫過熱刺主帥舒活日日畀佢老闆話下季要轉領隊，最新消息就係尹高爾過來教，雖然上場以0比4輸畀車路士，但熱刺後防球員踢到送埋個波畀車路士入波，搵乜嘢領隊教都死啦。
中途換帥愈換愈衰

其實換主帥真係絕非靈丹妙藥，食咗就會起死回生、成績爆升，你睇吓今季中途換帥，有邊隊真係成績即時好好多，卡迪夫城？富咸？史雲斯？隊隊換完領隊後成績其實仲差咗，相反舒活以季中接手嚟講成績算唔錯。現今英超主帥，執教平均時間只有1.32年，某程度上可以見到英超愈來愈急功近利。但急功又係唔係有用呢？我就發現唔係嘞，你睇吓今年嘅Big4，除咗比歷連尼係第一年任教及莫連奴係回巢之外，羅渣士、雲格都唔係第一年教，球員唔係機械人，要時間溝通，了解戰術，班主唔畀時間領隊去改善，點會有好成績？

我記得睇中醫，中醫同我講過有一啲手尾長嘅病，例如鼻敏感，個病都跟咗你十幾年，你想用十幾日就醫好，根本唔合理，有好多問題都要有相對嘅時間先可以解決。 不過，我都有兩個方法可改善熱刺成績，第一係帶晒班球員去睇《戰狼300》，等佢哋唔好再見到車仔、曼城就腳震，要勇敢啲，好似斯巴達人咁同佢哋死過先得。第二係搵我着佢哋對手嘅波衫，等我燈死佢對家！但係今個星期熱刺嘅對手係我嘅愛隊阿仙奴，我就梗係唔會着阿仙奴波衫啦。

（now 621周一凌晨零時直播）