獅吼Hea踢益晒悉尼

猪拉多纳

今季澳職常規賽爭標形勢基本上大局已定，榜首布里斯班獅吼一枝獨秀，捧盃只係時間問題。正因為獅吼大把本錢在手，季尾開始鬆懈，尤其係客場表現，簡直可以用放軟手腳來形容。獅吼今日作客FC悉尼，失分危機甚大，讓波有暗湧。FC悉尼為季後賽席位而戰，必定搏命，一於揀讓球主勝。

（有線64及203台周五下午4時30分直播）

澳職常規賽只剩下五輪，布里斯班獅吼現時領先次席西悉尼流浪者十分，而且主要競爭對手西悉尼流浪者、墨爾本勝利近況麻麻，仲要兼顧亞冠盃，令球員疲於奔命，恐怕難對獅吼構成威脅。因此，獅吼可以話係冠軍在望，毋須急於搶分。球隊近期更揀波踢，有主場fans睇住先至落力比賽，作客經常Hea踢，近三次作客未贏過，僅入一球，包括同包尾嘅珀斯光輝悶和0比0，以及0比1輸畀尾二嘅墨爾本雄心，認真失禮，讓波信唔過。
FC悉尼爭分打季後賽

FC悉尼僅領先第七位紐卡素噴射機兩分，季後賽席位唔穩陣，餘下五仗皆不可怠慢。球隊主場取得兩連勝，包括上仗打吡戰擊敗西悉尼流浪者，表現夠晒說服力，絕對有權喺獅吼身上取得分數。