不來梅史特加鬥守獻細

猪拉多纳

德甲雲達不來梅主場對史特加，執教多家德甲球會嘅荷蘭教練史堤芬斯又返嚟啦，今次佢去史特加救火，呢位「穩陣先生」上任後第一仗就要作客，當然唔會急進，面對靠死守頻獲甜頭嘅雲達不來梅，隨時大放悶氣，首選2.1倍細盤。
史堤芬斯救史特加先求穩

今次已經係史特加今季二度換帥，上手教頭舒尼達季初接替拉巴迪亞後曾經有連續7輪不敗嘅理想開始，不過呢位41歲少帥畢竟欠缺經驗，成績好快回落，近期連輸8場，直至上仗主場面對包尾嘅布倫瑞克至唔使輸，但一度反先對手都攞唔晒3分，球會無奈下再次換帥，其實史特加近期大部分比賽都係得勢不得分，球隊成日搶攻，但前線欠具卡士終結者，防線空虛又易輸反擊，舒尼達領軍喺留放同節奏方面都顯得太單調。如今史堤芬斯領軍，會更要求攻守平衡，前線首席射手伊比斯域仲坐緊波監，今晚作客首要做好防務，要救隊波需要按部就班。

另一邊廂，杜特帶領嘅雲達不來梅同舒尼達嘅史特加啱啱相反，無論遇強遇弱都駐重兵後防刻意主守，一味等對手犯錯至打反擊，無論控球同射門次數都輸畀人，欠創造性啲波唔好睇，但呢招遇上普遍重攻輕守嘅德甲對手竟然收效，近4仗兩勝兩和，失勢但得分，當然對手都唔算叻，但杜特嘅悶功的確幫球隊攞咗唔少唔係咁應得嘅分數，今晚當然照辦煮碗。　　
有線64及203台 周六晚10時30直播