有理想同夢想港足仲有救

猪拉多纳

Peter今個禮拜出席中文大學一個關於香港足球嘅研討會，由於香港足球近期出現唔少負面消息，席間唔少學生都問起香港足球係咪絕望甚至冇希望。Peter就斬釘截鐵咁話唔係，我認為只要積極面對，有理想同夢想，任何事都由低層做起，百分百投入加上上下一心，自然鐵柱都能磨成針。
湯馬士修士最好榜樣

Peter嘅信念係Don't Give Up，即係永不放棄，恰巧上周五HKD1 B Grade足球賽，由Peter母校聖約瑟對拔萃就證明筆者嘅見解係有根據。點解咁講呢？其實兩間學校球隊嘅大部分球員都係由細到大已喺學校跟隨有組織嘅青訓，根基自然非常穩固，加上學校一向以「讀書為主，體育第二」，所以呢班小朋友可以話係「讀得又踢得」，自然獲家長大力支持。

兩校嘅背景同運作都好相似，今場賽事誰勝誰負其實唔重要。Peter想講嘅係聖約瑟校監湯馬士修士自上世紀60年代已經嚟到香港，一直不遺餘力打造學校嘅學術同足球成績，前香港足球先生山度士亦係由湯馬士修士一手一腳栽培，比賽當日兩校嘅啦啦隊同學生都非常投入，甚至比本地甲組波有過之而無不及，而身體抱恙嘅湯馬士修士亦特別獲醫院批准可以到球場督師，當佢見到球員出色嘅表現亦不禁老淚縱橫，其精神絕對值得致敬。

Peter始終覺得香港足球要成功，一定要由根基做起，要有熱情、勤力、盡心盡力、為自己工作而自豪，如果以「打卡」嘅心態去做呢份工，係絕對唔會成功。Peter相信只要有多啲好似湯馬士修士對足球咁有熱誠嘅人支持香港足運，港足自然可以重回成功之路。
金句：香港足球希望啟示錄……