漢堡齊心「紐」轉乾坤

猪拉多纳

史隆卡有料 雲達華治復出

德甲今晚上演護級大戰，力求避免歷史性降班嘅漢堡，將會喺主場迎戰紐倫堡。漢堡家陣排喺尾三，但同尾五嘅紐倫堡其實只係相差3分，護級形勢充滿變數。漢堡自從搵到護級專家史隆卡執教後戰績冒升，今場更有王牌雲達華治復出，有力開W，唔使講，阿占撐硬漢堡！

（有線61、64、201及203周日晚10:30直播）
紐倫堡柏尼爾遜抖3周

漢堡自從搵到史隆卡頂雲馬維克做主帥後，3場聯賽有1勝1和1負佳績，當中3:0炒起多蒙特更加係代表作！查實史隆卡早喺2010年臨危受命教漢諾威，就即刻幫佢哋護級成功，第2年仲帶隊殺入歐洲賽，有料到！雖然漢堡今仗有左閘馬素贊臣同前鋒拉蘇加缺陣，但隨住荷蘭球星雲達華治病愈復出，中場創造力夠晒保證，有力幫史隆卡再添勝仗。

紐倫堡歇冬後強勢近期已告終，連續兩場聯賽輸波吞咗5隻蛋，後防主力柏尼爾遜更喺賽前練波嗰陣拉傷肌肉，經檢查後證實要抖3個星期，紐倫堡冇咗呢位經驗豐富嘅瑞典國腳壓陣，防線肯定勁多甩漏，今鋪作客都係凶多吉少。
頂占筍盤：漢堡（主勝）