葡超波圖贏到唔識「亭」

猪拉多纳

士砵亭同波圖兩支傳統勁旅今晚對壘，成為本周葡超矚目大戰。波圖周中喺歐霸盃擊敗意甲班霸拿玻里，證明呢班波堅有料到，唔單止令士氣大振，中場迪科亞更信心十足，話明唔理對手係邊個，波圖都會擺強陣喪攻，完全唔放士砵亭在眼內。梗係啦，波圖近3季都食住死對頭，往績贏足9條街，波圖今場小讓平半，撐2倍上盤！

（開賽時間：周一凌晨3:15）
士砵亭近3季對賽未W過

波圖近3季對住士砵亭都未輸過，今季聯賽首循環主場更以3:1擊潰死敵，心理上先勝一仗。而且呢支葡超班霸，出到去歐戰一樣有料到，周中喺歐霸盃16強首回合主場以1:0擊敗拿玻里，球員無論士氣、狀態都肯定進一步提升。

係，你可能會話呢場波影響咗佢哋嘅體能，但佢哋件中場大將迪科亞就唔係咁睇：「對住拿玻里，我哋都冇諗過要守！無論對手係拿破里定士砵亭，我哋都唔會改變打法，一於上到場就狂攻！呢場勝仗令我哋更加有信心！波圖對住任何對手都唔使驚！」

無疑對家士砵亭狀態都唔錯，新紮中場舒卡巴拉更弗到漏油，仲有可能喺今場正選上陣添，不過咁，論實力同平穩性，波圖始終高過對手半班，你有舒卡巴拉，波圖亦有當紅射手積臣馬天尼斯，睇埋個對賽往績，呢場梗係撐波圖上盤啦！