皇蘇「讓主」捉蝙蝠

猪拉多纳

今晚西甲有兩支同屬中上游嘅球隊對碰，皇家蘇斯達會喺主場迎戰華倫西亞。依家皇蘇排喺第6位，如果想出席下季歐洲賽，必須喺呢啲「6分波」主場搶分。「蝙蝠兵團」華倫上周四喺歐霸盃飛咗去保加利亞作賽，未有咁快回得切氣，相信會係連敗兩場嘅皇蘇反彈好時機，不妨玩3.55倍「讓主」。

（now632台周一凌晨4:00直播）

皇蘇早前喺技術性擊到「地上最強」巴塞之後，無以為繼連輸兩場，今輪聯賽未開始前，只領先第7位嘅西維爾2分，想參戰下季嘅歐洲賽一定唔可以再鬆懈。佢哋個射手卡路士韋拿、中場基沙文今季表現大熟大勇，合共攻入25球，特別係年僅23歲嘅基沙文，更以15球成為皇蘇首席射手，相信好快就會引嚟大球會出手搶人，只要上述兩人今晚發揮出水準，要喺疲兵華倫身上入波應該唔係難事。
華倫歐霸盃搏到殘干卡維斯陷入球荒

華倫西亞經過季中人事變動後，前鋒柏高艾卡沙得到更多上陣機會，佢亦貢獻6個聯賽入球報答球會。弊在另一主力莊拿芬干卡維斯近期陷入球荒，間接影響「蝙蝠兵團」戰績。佢哋上場歐霸盃喺大部分時間踢少個嘅劣勢之下贏波，可以話搏到殘晒，今晚係佢哋4日內第2場作客賽事，仲要面對主場出名夠惡嘅皇蘇，對後備兵源唔算充足嘅華倫嚟講，絕對係一大考驗。