PSG打「聖」戰「大」無畏

猪拉多纳

兩軍火力猛硬碰硬

巴黎聖日耳門（PSG）將會返回法甲繼續屈機，今晚喺主場恭候聖伊天。齋睇牌面梗係PSG高幾班啦，但查實雙方近季交手，呢支法甲班霸都冇乜甜頭，既然PSG火力咁強，聖伊天戰將賽前又會話豁出去，1.72倍「入球大」唔捧點得呀？

（TVB302周一凌晨4:00直播）

聖日耳門連續12場聯賽不敗，目前拋離次席嘅摩納哥8分，爭標形勢大好。教練白蘭斯前晚向《巴黎人報》證實，上星期去慕尼黑睇膝傷嘅右閘雲達韋爾趕唔切歸隊，中場馬高華拉堤亦因為大腿有傷唔會落場。
馬度迪復出倒戈

不過，PSG勝在板櫈深度雄厚，查列同新兵卡比耶都可以頂替上述兩位十字軍，加埋周中休戰嘅馬度迪會復出倒戈，為前線「三叉戟」嘅伊巴謙莫域、拿維斯同卡雲尼提供彈藥，戰鬥力一樣咁得人驚。

之不過你話PSG贏硬聖伊天咩？咁又未必喎！睇番雙方交手往績，計埋法聯盃在內，聖伊天對上5次撼聖日耳門都未試過喺法定時間內輸波，隊長盧斯佩連賽前仲話，PSG個個都係球星，聖伊天去到佢哋地頭根本冇嘢可以輸，聽佢咁講，似乎諗住同班兄弟豁出去鬥攻喎，入波梗係唔慌少啦！