「雌狼」黑到痹烏甸「讓客」有驚喜

猪拉多纳

季初贏到開巷嘅羅馬，踏入三月後頭頭碰着黑，球員打人被罰停賽、重創收咧瓣瓣齊，就連喺月頭先話爭標未絕望嘅教練魯迪加西亞，日前都扯白旗投降，今晚意甲就算主場出戰都冇贏波把握，博受讓嘅烏甸尼斯2.95倍「讓客」。 （TVB301及廣東體育周二凌晨4:00直播）

「雌狼」今個月黑仔到痹，繼中場迪羅斯喺月初拳打莫路伊卡迪被罰停賽3場，荷蘭國腳史杜特文喺上輪鬥拿玻里更加重創離場，賽後證實左膝十字韌帶撕裂，無論今個賽季定係世盃都宣布玩完，加上後衞馬爾干儲夠黃牌要坐波監，真係要幾黑有幾黑。
烏甸鬥強隊特醒

本來傷咗成個月嘅托迪，今場擺脫臀傷復出對羅馬帶嚟振奮作用，弊在主帥魯迪加西亞突然扯白旗投降，由月初豪情壯志話要挑戰衞冕冠軍祖雲達斯，相隔唔夠兩個星期嚟個180度轉變，喺上場輸畀拿玻里之後就話爭標冇行，試問連續三場啞火嘅迪斯度同謝雲奴邊有動力搏殺先？

現時排第14位嘅烏甸尼斯，今季聯賽作客雖則只贏過薩斯索羅、利禾奴同博洛尼亞呢啲下游隊伍，不過佢哋對住前列分子往往踢得醒神，試過同「三哥」拿玻里激戰至3:3，硬撼榜首祖記亦堅守到完場前最後一刻至被攻破大門，今場趁住「雌狼」表現回落，絕對有機會全身而退。