車仔守「細」波恭候魔獸回歸

猪拉多纳

莫連奴妙手困「魔獸」？今晚歐聯16強次回合，輪到車路士主場對加拉塔沙雷，首回合兩隊1:1打成平手，戰況激烈。今場焦點肯定落喺重返史丹福橋球場倒戈嘅杜奧巴身上，今晚各為其主，以「寸王」嘅風格，肯定擺天羅地網陣凍結杜奧巴。不過莫連奴始終係穩陣嘅人，今場隨時但求贏少少晉級就算，2倍入球細值得支持。

（有線61、64及201、中央5台周三凌晨3:45直播）

莫連奴當年一手將杜奧巴帶嚟車路士，聯手打出輝煌江山，今場大戰之前，兩個都互笠高帽，「魔獸」話只要「恩師」開聲，佢隨時會重返「藍戰士」幫手。雖然佢兩個第日有無機會再合作就唔知，但莫帥絕對係當今球壇最熟悉杜奧巴嗰個，今場必定有計嘜到佢實，想入波都難。
藍戰士冇前鋒靠得住

不過車仔自己條鋒線亦有隱憂，費蘭度托利斯鼠蹊受傷，今場上陣與否係未知數，伊度奧同丹巴巴亞又略嫌表現飄忽，所以莫連奴前排話車仔冇前鋒係有道理o架，至少依家冇一個可以畀到人十足信心嘅前鋒壓陣。如果唔係，都唔會傳出最近喺倫敦同巴西前鋒侯克見面斟加盟啦！
史丹福橋少失多過1球

車仔今季成績咁好，全靠有條極度堅固嘅防線。原來「藍戰士」已經連續5場主場未失1球，對上一次喺主場畀對手入多過1球，已經要數番去上年11月對西布朗。加拉除咗杜奧巴外，另一個王牌史奈達亦係莫連奴舊部，相信以「寸王」嘅功力，要箝制對方兩大球星唔難，今場就算入唔到波都唔慌會輸，入球細好路。

首回合：車客和1:1
Data King：加拉8次訪英不勝

‧車路士近12次主場出戰歐聯取得10勝1和1負。

‧加拉過往8次出戰英格蘭未贏過，僅得3和5負。

‧車路士近10戰主場半場從未落後，錄得7勝3和佳績。
頂占筍盤：車路士（入球細）