恒大 全北合演榜首「大」戰

猪拉多纳

羊城今日爆發亞冠盃G組榜首大戰！廣州恒大（足智彩譯FC廣州）喺天河主場迎戰韓職勁旅全北汽車，呢兩支同樣4分嘅「帶頭大哥」，攻擊力比較強悍，1.59倍入球大抵博。（now671台周二晚8:00直播）

恒大同全北汽車真係幾有緣，近兩年嘅亞冠盃都同組，大家打到熟晒路，戰績亦都係各勝一場，打和兩場，4戰拉成均勢。由於恒大主場兩戰全北得和負各一，全部輸盤，今場波博個1.36倍主W冇乜味，2.03倍「讓球主勝」又有啲牙煙，所以都係買大着數啲，事關兩邊嘅前鋒都好夠級數。
迪亞文迪抖夠穆里奇小腿輕傷

上星期响亞冠盃作客橫濱水手和波嘅恒大，目前最大問題係班波未上力，意大利新兵迪亞文迪雖然弗到漏，可惜另一部入球機器穆里奇小腿傷患未清，近兩場波都踢唔足，恒大賽前推出嘅兩款宣傳海報，其中一款「等鋒到」明顯係寓意期望穆里奇翻生。

呢一點絕對係今場波嘅勝負關鍵，因為迪亞文迪公認作用超過走咗嘅孔卡，只要穆里奇重振虎威，恒大又會恢復舊年稱霸亞冠嘅強橫鋒力，主帥納比刻意喺上輪中超減少迪亞文迪、鄭智、金英權、孫祥同穆里奇嘅落場時間，就係為咗養足精神今晚拆「車」。

全北汽車目前同恒大一樣，都喺本土聯賽帶頭，不過今次佢哋只係帶咗16件兵去廣州，似乎志不在此。韓國嗰邊消息話，今年正好係全北創會20周年，老細緊張韓職多過亞冠，上場作客打和墨爾本勝利都敢放4、5個後備打正選，就知佢哋諗緊啲乜。由於全北板櫈深度夠，鋒線又有「獅子王」李同國（原名李東國）擔大旗，肯定唔齋求1分咁縮骨，呢場波開大好正常。